Twitter I-Phone və Android proqramları üçün yeniləməni elan etdi. Bu yeniləməyə görə istənilən şəkildə 10 nəfərədək işarələmək və eyni anda 4 şəkilə qədər yükləmək mümkündür. İstənilən insanı işarələyə bilmək üçün ekranda “Bu şəkildə kimdir?” düyməsi görünür. Əgər istifadəçi dostları işarələməyi seçərsə, bu işarələr Tweet`in içində yer tutmur, yenə də bir Tweet`ə əvvəlki qədər yazı daxil etmək olur. Eyni zamanda Parametrlər içərisindən istifadəçi onu kimlərin şəkillərə işarələyə biləcəyini və xəbərdarlıqları alıb-almamağı kontrol edə bilər. Twitter`in açıqlamalarına görə bu yeniləmənin əsas səbəbi odur ki, istifadəçilər izləyə biləcəkləri insanları daha rahatlıqla tapsın və Tweet daha geniş kütləyə çatdırılsın. Daha böyük səbəb isə, bu işarələr vasitəsilə Twitter`in şəkilləri şəxslərə görə indeksləməsinin mümkün olmasıdır. Yəqin ki, yaxın zamanda Twitter də, Instagram kimi istifadəçiləri “Şəkillərim” bölməsi ilə təmin edəcək. Bu yeniləmə istifadəçilər üçün faydalı olsa da, Twitter artıq Facebook və Instagrama həmişəkindən daha çox bənzəyir.